Бүгин 4-декабрь күни Қарақалпақстан Республикасы И.В.Савицкий атындағы Мәмлекетлик көркем-өнер музейинде «Жәҳән халықлары липаслары» атамасындағы көргизбениң ашылыў мәресими болып өтти.

    04 декабрь, 2019 26 qqr Qoraqalpog'iston voqealari

     Көргизбеден 70 тен аслам қарақалпақ, өзбек ҳәм рус художниклериниң шығармалары орын алған. Дүнья  халықларының тарийхый ҳәм миллий кийимлери сәўлеленген А.Сарио, Д. Ушаков, А.Николаев, М.Курзин, Е.Коровай ҳәм А.Шпадылардың графикалық жумыслары ең биринши мәрте тамашагөйлер нәзерине усынылып атыр. 

              Көргизбениң мақсети – бурын көргизбеге қойылмаған музей фондларындағы шығармаларды көрсетиў, көргизбеге қойылған графикалық жумыслар мысалында  жер жүзи  халықларының тарийхый ҳәм миллий липасларының рәңбе-реңлиги ҳәм айрықша белгилери менен  музей көриўшилерин таныстырыў; халықтың мәдений билим, эстетикалық тәрбия дәрежесин асырыў; жасларды Ўатанға ҳүрмет ҳәм сүйиспеншилик рухында тәрбиялаў.

    Адам ушын кийим – тек ғана сыртқы көринис, сыртқы белги яки әҳмийетли болмаған қосымша емес, ал ол адамларды қоршап турған басқа материялық орталыққа (жай, квартира, мебель, үй буйымлары) салыстырғанда анағурлым дәрежеде белгили бир топардың, бир миллеттиң яки толық бир дәўирдиң өмири, олардың тиришилигиниң тиккелей нышаны саналады.   

     Кийим адамның миллий ҳәм қатламлық келип шығыўы, оның жасы ҳәм мал-мүлклик жағдайын көрсетеди. Қандай да бир  ўақыт өтиўи менен гезлемениң сапасы  ҳәм реңи, кийимниң пишини ҳәм нағысы, онда бир бөлеклердиң ҳәм безеклердиң барлығы яки жоқлығынан келип шығып дөгеректеги адамларға жеткериў мүмкин болған мағлыўматлар көлеми геометриялық прогрессияда өсип барады. Басқа көркем-өнер түрлери менен салыстырғанда, кийиниў  көркем-өнери және бир әҳмийетли қәсийетке ийе болып, бул халық өмириндеги ўақыяларға, рухый тараўда эстетикалық ҳәм идеологиялық бағдарлар өзгерисине  жүдә тез ҳәм кең мүмкиншиликлер менен жуўап бере алады.

     Бул көргизбеге өзбек художниги Д.Ушаковтың 60 тан аслам  графикалық дөретпелери қойылған. 1934 жылдан баслап художник жәҳән  халықларының барлық дәўирлердеги кийимлериниң альбомын жаратып баслайды.  Ушаков художниклердиң жумыслары, картиналары, ески китаплар ҳәм илимий басылымлар, сүўретлер, реклама проспектлери ҳәм мода журналларының ҳәр қыйлы материаллары негизинде ишинен көркем ҳәм характерлилерин сайлап алған ҳалда костюмларды тиклеп баслайды. Художник өзиниң жумысларында дүнья  халықларының тарийхый ҳәм миллий кийимлериниң  рәңбе-реңлиги  ҳәм өзгешелигин көрсетиўге ҳәрекет еткен:  «Ферғаналы жас ҳәм жасы үлкен ер адамлар липаслары»,« Г.Венс бойынша Египет (әййемги):Мырзалар   ҳәм ҳасылзада ҳаяллар липаслары», «Франция.  Бретонлылар кийими.» ҳ.т.б

    Т. Қайыпбергеновтың «Қарақалпақ қызы» романы тийкарында алынған «Қайсар қыз» көркем фильми ушын сызылған ер адамлар  ҳәм ҳаял-қызлар кийимлери эскизлеринде қарақалпақ художниги А.Шпады қарақалпақ миллий липасларының ҳақыйқый көринисин өзгертпеген  ҳалда, кийимлердиң күнделикли ҳәм образлы тәреплерин тәбийий байланыстырған.

     

     

     Реалистлик бағдарда исленген рус художниги А. Сарионың жумыслары Мексикалы ер  ҳәм ҳаял индеецлердиң  нағысланған  миллий кийимлердеги образларын сәўлелендиреди: «Индеец», «Роза Сапотека ақ кийимде».

     

     

     

     

     

     

    Т.Жумабаев

     

    шаблоны для dle 11.2
все шаблоны для dle на сайте newtemplates.ru скачать